КОЦУР – Закончуюци испит того школского року у Основней школи „Братство єдинство” у Коцуре покладали 42 школяре осмей класи. По словох компетентних зоз коцурскей Основней школи, покладанє шицких трох тестох прешло у порядку, а єдна школярка пре оправдани причини нє покладала закончуюци испит.
Мали матуранти перше покладали тест зоз сербского, односно мацеринского язика, другого дня покладали тест зоз математики. Трецого дня шицки школяре покладали тест з предмета по вибору. Коцурски школяре на уровню школи зоз мацеринского язика просеково освоєли 8,46 боди од можлївих 20. Зоз математики школяре зазначели просекови резултат од 9,89 боди, а зоз виборного предмету посцигли резултат од 10,00. Школяре рускей класи зоз мацеринского язика просеково освоєли 13,67 боди, з математики 8,75 боди, а з виборного предмету 10,76 боди.
По обявйованю конєчних резултатох, найвецей школярох зоз Коцура предлужи свойо стредньошколске образованє у Стреднєй фаховей школи „4. юлий” у Вербаше, Стреднєй технїчней школи „Михайло Пупин” у Кули, Ґимназиї „Жарко Зренянин” у Вербаше и Польопривредней школи зоз домом за школярох у Футоґу, як и у Стреднєй медицинскей школи „Козма и Дамян” у Вербаше. Матуранти ше уписали и до стреднїх школох у Новим Садзе, Зомборе, а єдна школярка ше уписала до Ґимназиї „Петро Кузмяк” у Руским Керестуре.