НОВИ САД – На 101. схадзки Управного одбору НВУ Руске слово отриманей у просторийох Установи штварток, 16. юлия принєшена Одлука о розписованю Явней оглашки за вибор директора НВУ Руске слово, и меновани нови члени совитох НВУ Руске слово.
Члени Управного одбору на схадзки принєсли Одлуку о розписованю Явней оглашки за вибор директора НВУ Руске слово, хтора будзе обявена 24. юлия у новинох Руске слово, число 30 и на сайту НВУ Руске слово. У складзе зоз тоту Одлуку утвердзени и текст Явней оглашки.
Потим менована и Комисия за отверанє приявох зоз документацию, хтори сцигню на Явну оглашку за вибор директора НВУ Руске слово, а у Комисиї буду: Мирослава Даждиу, Блажена Хома Цветкович и Таня Салонтаї.
На схадзки розришени члени совитох НВУ Руске слово хторим вишол мандат и меновани нови члени совитох: Совиту новинох Руске слово, Совиту часописа за дзеци Заградка, Совиту часописа за младих МАК, Совиту часописа за науку, литературу, културу и уметносц Шветлосц и Совиту Видавательней дїялносци.
Присуствовали шицки дзевец члени УО, а схадзку водзела предсидателька УО Златица Няради.
