РУСКИ КЕРЕСТУР – Привредно-туристично-културна манифестация „Днї керестурскей паприґи” будзе отримана 22. авґуста у центру валала, а як уж традиция наклада, орґанизаторе ше и того року остарали за рижнородни и богати змисти тей програми на чесц керестурского бренду–паприґи
Орґанизацийни одбор тей манифестациї, спред Здруженя продуковательох паприґи „Капсикум анум”, отримал уж даскельо схадзки на котрих утвердзени деталї коло манифестациї, а на остатнєй догварене же ше отвераю прияви за викладанє на штандох и за варенє єдлох, а найвецей дискутоване о трошкох орґанизациї.
Як потолковане, манифестация будзе у истей форми як и скорейших рокох, плановане же би були штанди на котрих ше представя хемийни, нашеньски и осиґуруюци подприємства, потим буду и штанди на котрих годно виложиц и предавац продукти домашнього виробнїцтва, и польопривредни продукти. Як уж традиция наклада, и числени єдла зоз котлох и други специялитети з котрима домашнї кухаре укажу свойо схопносци.
Шицки заинтересовани за викладанє на штандох, и за варенє єдлох треба же би ше приявели ґу Душици Орос на телефонске число 064/978-1413.
Плановани дефиле парадних запрагох, за наймладших учашнїкох маскенбал, пригодна културно-уметнїцка програма, и награди за найлєпши штанд, найороґиналнєйшу маску, и найчежшу паприґу.
Релативно нєизвесне финансованє манифестациї, та орґанизаторе апелую на членох Здруженя же би виплацели членарину, лєбо же би ю потримали зоз донациями.