Господ Бог пришол медзи нас

автор мгк
1.2k Опатрене

НОВИ САД – Апостолски еґзарх за грекокатолїкох у Сербиї, владика Георгий Джуджар, пияток, на Вилїю по юлиянским календаре, у Новим Садзе предводзел Вельке повечериє з литию – Крачунске всеночне, а всоботу, на Перши дзень Крачуна, Архиєрейску Службу Божу. Сослужел парох о. Юлиян Рац, у Служби шпивал Хор „Гармония”, з хторим дириґовала Весна Кесич Крсманович, а солистка була Ана Римар. Окрем у обисцох, колядовало ше и у церковней сали, а було мированє.

– Господ Бог пришол медзи нас, народзел ше як чловек же би нас спашел од гриху и даровал нам живот вични. То була давна обецунка ище у раю, вєдно з кару, кед було обецане же Исус надвлада диявола. Цале Святе писмо полне надїї же придзе Спаситель и будзе син чловечески. Ангелски сили и гвизди наявели Спасителя. Явели пастиром же ше народзел Исус – створитель нєба и жеми. Вони ше му перши поклонєли – гварел кир Георгий.

– Гвизда трох царох доведла до Исуса. То було сполнєнє Божого плану спашеня людского роду. Исус Христос помирел людзох з Богом. Вон заплацел за нашо грихи и провадзи нас до живота вичного. Знак – то його воскресенє и воскресенє цалого людского роду. З приходом Исуса Христа нам отворена и обявена драга до Царства нєбесного – гварел наш владика у казанї у Новим Садзе.

1-Novi_Sad-02

ПОВЯЗАНИ ТЕКСТИ