РУСКИ КЕРЕСТУР – После двох тижньох, на стадионє Фодбалского клубу (ФК) „Русин” на Ярашу у Руским Керестуре уключена струя, хтора була виключена пре нєвимирене длуство за струю.
Длуство за струю вимирене з добродзених прилогох приватного поднїмателя и директора Клубу Александра Кочиша, котри дал два трецини потребней суми, и вирного „Русинового” навияча Вуядина Щекича, котри дал єдну трецину средствох.
– Дзекуєме людзом котри любя фодбал на таким красним ґесту, а були у можлївосци помогнуц. Гоч тераз нє сезона, функционованє Клубу було наисце очежане – гварел тренер ФК „Русин” Златко Саянкович.
Як Рутенпрес дознава од Саянковича, средства з керестурского самодоприносу, по конкурсу за отримованє спортских манифестацийох за 2017. рок хтори розписала Општина Кула, ище вше нє уплацени.