НОВЕ ОРАХОВО – XXV Преслава нового хлєба отримана всоботу, 22. авґуста на спортских теренох, то манифестация пошвецена очуваню традициї, а источашнє ше дава подзековносц на новим урожаю и пестує културне нашлїдство.
Програма манифестациї була барз рижнородна, а у нєй участвовали и члени КУД „Петро Кузмяк”, МО Рускей матки „Орех”, а на културно-уметнїцкей програми участвовали домашнї аматере и госци, старша фолклорна ґрупа КУД „Жатва” зоз Коцура.
Цалодньова програма була рижнородна зоз спортскима змаганями у фодбалу, одбойки на писку… Члени МО Рускей матки Орех дополадня бавели фодбал, варели котлїк як и члени КУД „Петро Кузмяк”.
Новоораховчанє положени венєц на гроб Ґабра Калмара на теметове, у Католїцкей церкви Христа Спасителя пошвецени нови хлєб, а у Доме култури бул саям ручних роботох. Найсмачнєйши паприґаш уварел Яким Гайдук Кико зоз свою екипу.
Вечарша културно-уметнїцка програма була богата, на нєй участвали и члени руских КУД зоз Нового Орахова и зоз Коцура. Програму отворел предсидатель Општини Бачка Тополя Адриан Сатмари.
