ДЮРДЬОВ – И того року Дюрдьовчанє Перши май найчастейше препровадзели у природи, лєбо камповали у околїску.
Млади з валалу углавним камповали даскельо днї на Старей Тиси у дюрдьовским хотаре у лєшику або на даєдним зоз салашох у тей часци хотара, дзе пришли и млади зоз Шайкашу, Мошорину и Жаблю. Медзитим, того року вельо младих з Дюрдьова було и на Старей Тиси на Банатским боку у ушореним парку, або пошли ище далєй – на Фрушку гору, до Каменїцкого парку у Сримскей Каменїци, або на Дунай до Тителю. Найменєй було гевтих котри пошли на єднодньови вилєт до банї у Мадярскей або городох у Румуниї и Босни.
Старши валалчанє Перши май преважно препровадзели по обисцох, дзе як и векшина пекли месо на роштилю або варели котлїк. Млади малженски пари углавним остали у валалє, та свойо дзеци одведли на бавенє до парку.
