Фото: pixabay.com

Облєчиво и опрема. Пушка и муниция. Став. Мета. Сцерпезлївосц и концентрация. Шицко тото, а можебуц и вецей, потребне за спорт котри тренира Ивана Виславски з Панчева, школярка другей класи стреднєй Економско-тарґовинскей школи ,,Пая Марґанович” у Панчеве. Гоч штреляцтво звичайно приписуєме хлопскому роду, нашей собешеднїци, Ивани, воно состойна часц живота уж пейц роки.

Ище кед мала 11 роки, розвила любов ґу тому спорту, алє и упартосц и витирвалосц же би з дня на дзень у тим спорту була вше лєпша. О тей любови и успишних резултатох котри Ивана зазначела на рижних змаганьох, шведоча вельо медалї и дипломи котри прикрашую єй мур и даваю єй мотивацию за нови змаганя.

Тренираш єден, мож повесц, и нє таки звичайни спорт за жени. Кеди и як ши ше зантересовала за штреляцтво? 

Ивана Виславски: Гей, гоч то нє нательо женски спорт, досц єст дзивчата цо го тренираю. Єдноставно, чула сом за тот спорт, зацикавел ме и сцела сом ше у нїм опробовац. То ми уж пияти рок як тренирам и затераз сом задовольна як ми идзе.

Як други реаґую на тото же тренираш штреляцтво?

ИВ: Другим, углавним, чудно же тренирам праве тот спорт, алє познєйше их интересує як то шицко випатра и функционує.

Як часто маш тренинґи и як вони випатраю?

ИВ: Тренинґи мам два раз, три раз у тижню и углавним кажди исти. Досц ше роби на сцерпеню и концентрациї, як и самим штреляню.

Кажди спорт глєда одреканє и пошвеценосц кед жадаме буц у нїм добри. Чи то так и у штреляцтве?

ИВ: Праве так. З оглядом на тото же змаганя каждого викенду, а и тренинґи можу буц досц напарти, тот спорт вшелїяк подрозумює досц одреканя.

Кадзи ши була на змаганьох? Можеш видвоїц за це найзначнєйши успихи?

ИВ: Потераз сом досц путовала, углавним по Сербиї, а першираз сом була на Медзинародним турниру у Нїтри у Словацкей, цо було єдно нове и красне искуство. Кед слово о посцигнутих успихох, найзначнєйша ми стриберна медаля на Лиґи Войводини, златна на Першенству Войводини и злато на Державним першенству зоз малокалибарску пушку у катеґориї пиониркох. Достала сом и припознанє за найуспишнєйшу пионирку Войводини у прешлей сезони. Було ище медалї, алє ми тоти назначнєйши.

Ти перша у Сербиї у троставу з малокалибарску пушку. Кельо за це особнє знача шицки тоти успихи?

ИВ: Шицки тоти успихи ми наисце вельо знача и даваю ми мотивацию за нови змаганя. Алє вшелїяк мушим додац, же попри шицких тих змаганьох и успихох, наисце ми барз значи потримовка родичох, фамелиї, як и товаришох.

Маш дакого на кого ше упатраш?

ИВ: Могла бим повесц же Ивана Максимович особа на котру ше упатрам. Анї сама нє знам прецо, алє якошик, ю любим патриц на змаганьох.

Яке чувство кед штреляш зоз пушку? Мож то вообще описац?

ИВ: Нє знам як бим то описала. Якошик, мнє то виполнює, алє кажде ма иншаке чувство.

Яки твойо цилї за далєй?

ИВ: Цо ше дотика моїх планох за далєй, пробуєм посцигнуц цо лєпши резултати, понеже од тей сезони штрелям за старши катеґориї.

Цо биш поручела другим котри тиж так зацикавени за тот спорт?

 ИВ: Вшелїяк бим им поручела же би ше, кед су зацикавени, обовязно голєм опробовали у тим спорту, прето же тот спорт наисце добри и нє буду бановац.