РУСКИ КЕРЕСТУР – Внєдзелю, 12. авґуста, закончени 5. Водицов камп 2018. за дзеци и младих, од пиятей класи по штредньошколцох, хтори тирвал од 9. авґуста. На кампу були присутни коло сто учашнїки найвецей з Керестура, потим з Коцура, Дюрдьова, Кули, Вербасу, Нового Саду, Суботици, Бачкого Брегу, Панчева, Беоґраду и з Канади.
Камп закончени зоз Службу Божу на 11,30 годзин хтору служел парох керестурски о. Михайло Малацко. Вон у казанї визначел же камп успишно предлужує традицию дакедишнїх духовних вежбох за младих хтори у керестурскей парохиї почали пред 40 роками.
Главна тема Кампу була История церкви, а о нєй бешедовал о. Малацко, потим дипл. психолоґ Соня Виславски пририхтала тему о превозиходзеню депресиї и осаменосци, а рижни теми пририхтали и млади волонтере керестурского Каритасу хтори и орґанизатор Кампу вєдно з Рухом фоколарох. Одвичательни кампу були Михаела Еделински и Павле Рац.
Водицов камп духовно-забавно-креативного характеру та було заступене дзелєнє духовних искуствох по ґрупох, як и вецей уметнїцки роботнї, спортски активносци, дружтвени бависка, танци и бал, а кажди дзень була и Служба Божа.
Финансийно капм того року потримала Українска амбасада з Беоґраду, у намирнїцох помогли керестурска Пекара „Макаї” и „Юарбис”, подприємства „Комфорт” и „Рен” подаровали 40 душеки, а з пенєжнима прилогами и намирнїцами помогли и велї парохиянє.
