БЕОҐРАД – Министер за людски и меншински права и дружтвени диялоґ Демо Бериша нєшка, 18. септембра, подписал одлуку о розписованю виберанкох за нови зволаня националних совитох меншинских националних заєднїцох хтори буду отримани на нєдзелю, 8. новембра, сообщене зоз кабинету министра, хтори тераз функцию окончує у технїчним мандату.
Як тиж сообщене, Министерство за людски и меншински права и дружтвени диялоґ пред тим дочасово заключело окремни виберацки списки 23 меншинских заєднїцох, же би ше утвердзело хтори сполнюю критериюми за директни виберанки, а хтори свойо национални совити виберу прейґ електорских скупштинох.
Заключене же 21 меншинска заєднїца сполнює предусловия за директни виберанки, а медзи нїма и наша, руска (як и албанска, ашкалийска, бошняцка, болгарска, бунєвацка, влашска, греческа, єгипетска, мадярска, македонска, нємецка, польска, ромска, румунска, словацка, словенацка, українска, горватска, чарногорска и ческа), док два заєднїци – ґоранска и русийска, отримаю електорски скупштини.
У наступним периодзе, релевантни информациї о меншинских виберанкох буду обявйовани на сайту Републичней виберанковей комисиї на тим линку.