РУСКИ КЕРЕСТУР – Здруженє спортских рибарох „Коляк” з Руского Керестура прешли викенд за своїх членох и других заинтересованих орґанизовало кампованє на познатим островку Камариште на Дунаю.
Як гварел предсидатель Здруженя Михайло Пашо, гоч заинтересованих було надосц, пре сезону обераня паприґи велї нє могли пойсц, та камповали дзешецеро сениоре и єден пионир. Рибаре три днї цали час лапали риби, а опробовали ше у вецей файтох риболову. Найвецей налапали харчи, деверики и чуки, а з налапаней риби себе рихтали єдзенє.
Познате дунайске островко Камариште од Руского Керестура оддалєне коло 30 километри, а ґу ньому мож дойсц лєм на чамцу.
Пре вельке интересованє, керестурски рибаре вироятно о мешац знова орґанизую ище єден одход на подобне кампованє.