РУСКИ КЕРЕСТУР – За тогорочну, 21. Мултимедиялну манифестацию младих „Дньовка”, хтора будзе отримана ютре, 17. новембра у Руским Керестуре, у орґанизациї младежского здруженя „Pact Ruthenorum”, приявени коло дзешец точки.
Главна програма „Дньовки”, на хторей млади наступя зоз музику и литературу, почнє на 21 годзин у Велькей сали Дома култури.
Пред тим, на 20 годзин, будзе отворена вистава фотоґрафийох хтори сцигли на Конкурс з тему „Вода”. Виложени буду 25 фотоґрафиї, а на главней програми буду преглашени и три найлєпши, чийо авторе достаню пенєжни награди, а вибере их Биляна Роман Чурни.
Попри вистави фотоґрафийох, того року буду виложени и „Квитки мудросци”, як и малюнки уметнїка Ратка Торму з Беркасова.
Зоз „Дньовку” будзе закончена тогорочна 25. Културна манифестация „Костельникова єшень”, у чиїх рамикох ше ю и отримує.