ДЮРДЬОВ – Всоботу, 5. мая, у просторийох Месней заєднїци (МЗ) Дюрдьов означени Дзень Дюрдьова – Дзуря. Означованє почало з пошвеценьом славского колача у просторийох МЗ, цо окончел православни священїк о. Петар Дюкич.
Совит Месней заєднїци Дюрдьов на тот дзень осми рок за шором додзелює плакети заслужним гражданом валалу. Присутних привитала Душанка Джамбас, предсидателька Совиту МЗ Дюрдьов и после привитних словох додзелєла плакети.
Того року додзелєни два плакети – Боривойови Отичови, новинарови и хронїчарови живота обичних людзох котри зоз своїма авторскима тв емисиями указує и чува од забуца традицийни сеґменти живота у Войводини и посила позитивну слику о нїх. Плакету превжал його младши син Неманя.
Другу плакету достало валалске Здруженє „Парастске шерцо” котре основане на инициятиву младих парастох з Дюрдьова, а котре ше намага ушориц и помогнуц свойому валалу. Вони у єдней гуманитарней акциї ушорели часц парку у валалє дзе ше бавя дзеци. Там поставени нови реквизити за бавенє, а стари пооправяни и офарбени.
После урядовей часци програми орґанизовани коктел за шицки присутних.
