ВЕРБАС – Моцни диждж и каменєц вчера коло поладня спадли у Вербаше и його хотарох, а найбаржей страдал Стари Вербас, дзе падал найвекши ляд. По словох жительох тей часци городу, каменєц бул вельки як черешнї, а по хотарох падал менши ляд и у меншей мири.
Диждж падал даскельо годзини, а найвецей у населєню „4. юлий” у Старим Вербаше, дзе за кратки час нападало прейґ 40 литри по квадратним метеру.
Оперативни технолоґ наводняваня у подприємстве „Сава Ковачевич” Драґан Дьордєвич за Рутенпрес гварел же ище нє мож повесц яка чкода за шаца, алє им нє похасновал.
– Щесце же векшина шацох тераз у ґенеративним периодзе, та ше нє очкодує плод, али сиґурно же таке нєщесце охаби пошлїдки. Ми маме коло 30 мерачи за воду у цалим городзе и по наших информацийох, найвецей води спадло у улїци Дюри Дяковича, дзе вимеране же нападала 41 литра води по квадртаним метеру – гварел Дьордєвич.
Моцни диждж и каменєц, хтори ше нараз злял на населєни часци городу, направели чкоди на закрицох и у зградох, а пре нєможлївосц швидкого одцеканя велького количества води, було єй и даєдних квартельох и пиньвицох.
Як дознава Рутенпрес, у вербаским и часци кулского хотара, медзи Савиним Селом и Нову Кулу, поля ше аж забилєли од каменцу.