РУСКИ КЕРЕСТУР – У рамикох 49. Драмского мемориялу Петра Ризнича Дядї всоботу, 18. марца, у голу Дому култури у Руским Керестуре отворена вистава малюнкох у технїки енкаустика Сонї Папуґа з Беґечу, родом з Миклошевцох.
Папуґовей то седма самостойна вистава, а оворела ю предсидателька Здруженя подобових уметнїкох „Ликум” з Нового Саду Любица Амиджич, чий член однєдавна и Папуґова. Слова потримовки єй роботи од Дружтва за руски язик, литературу и културу на отвераню вистави виповедла и Ирина Папуґа.
Як визначела Амиджичова, фасцинована є з тим цо дознала о Керестуре – же ту роби и єдина ґимназия у швеце на руским язику, тиж и з подобу Петра Ризнича Дядї, котри бул всестрана уметнїк, медзи иншим и маляр.
Бешедуюци о малюнкох Сонї Папуґовей, Амиджичова визначела же Соня барз добре звладала ремеселску часц енкаустики – кладзенє воску на горуцу пейґлу, а потим його преношенє на платно, алє и виражовац свойо емоциї и уметнїцки дожица природи, родного краю, птицох и подобне.
У голу Дому култури виложени коло штерацец роботи Сонї Папуґа, хтори нащивителє можу опатриц под час Драмского мемириялу.
(Вецей фотоґрафиї з отвераня вистави у окремней ґалери на правим боку сайту).