БЕОҐРАД – Нєшка на Шейдзешат другим Медзинародним сайме кнїжкох у Беоґрадзе, свойо виданя представя НВУ „Руске слово” и Завод за културу войводянских Руснацох (ЗКВР) у Гали „Александар Вучо” на 11 годзин.
НВУ „Руске слово” представи кнїжку поезиї „Дармоєди” Сашу Сабадоша, роман за младих „Инисур – рика княза” Себастияна Нярадия и кнїжка студийох, есейох, розправох „Складанє идентитетох” академика Юлияна Тамаша, шицки з тогорочней продукциї, як и два числа часопису „Шветлосц”.
Попри тих кнїжкох „Руске” представи и кнїжки з лоньскей продукциї, а хтори нє були презентовани на прешлорочним Сайме. То кнїжка критикох „Шитко” Олени Планчак Сакач, сликовнїца „Челядз дринкова” Михайла Ковача и штварти том позбераних творох Гавриїла Костельника „Роса и слунко”.
Нєшка свойо виданя на истим штанду представи и Завод за културу войводянских Руснацох – два нови, як и шейсц кнїжки з прешлорочних продукцийох. Публики будзе представене виданє мастер роботи Ани Римаровей „Уплїв українски писательох на Михайла Ковача” о хторим будзе бешедовац сама авторка, а в.д. Анамария Ранкович представи моноґрафию о Бикич Долу хтора вишла у януару того року у рамикох означованя Националного швета Руснацох у тим месце.
Кнїжки „Руского слова” и ЗКВР на Сайме нєпреривно виложени на штанду Покраїнского секретарията за културу, явне информованє и одношеня з вирскима заєднїцами.
Шейдзешат други Медзинародни саям кнїжкох у Беоґрадзе будзе тирвац по 29. октобер.