НОВИ САД – На Новосадским сайме нєшка, 6. марца, буду отворени три саямски манифестациї з обласци образованя, литератури и култури – 12. Медзинародни саям образованя „Драгокази”, 23. Медзинародни салон кнїжкох и 22. Медзинародна вистава уметносцох „Арт Експо”.
Нєшкайше отверанє спомнутих манифестацийох будзе на 11 годзин у аули Новосадского сайму.
На Салонє кнїжкох, на штанду Покраїнского секретарияту за културу, явне информованє и одношеня з вирскима заєднїцами, будзе представена и видавательна творчосц на руским язику.
Як наявене, о видавательстве на руским язику, насампредз у НВУ „Руске слово”, та о проблемох з финансованьом видавательней дїялносци на язикох меншинох, на Салонє кнїжкох будзе вецей поведзене на штварток, 9. марца.