РУСКИ КЕРЕСТУР – У рамикох Двацец шестих Спортских бавискох „Яша Баков”, вчера, 10. септембра, отримане змаганє у лапаню риби на дуґов, хторому домашнє було Здруженє спортских рибарох ,,Коляк” з Руского Керестура.
Змаганє отримане на ткв. „Лалицкей писти” на беґелю Дунай-Тиса-Дунай, од 10 до 12 годзин. Участвовали дзевец екипи з по трома членми – по єдна з Дюрдьова, Нового Орахова, Нового Саду, Бикичу, Вербасу, з Микошевцох з Горватскей и два екипи домашнього ,,Коляку”.
Перше место з влапенима 5 330 ґрамами освоєла екипа Керестурцох, у составе Янко Фекете, Яким Джуджар и Юлин Винаї, друге место освоєла тиж керестурска екипа, у составе Мирко Фекете, Златимир Рамач и Мирон Лазор з влапенима 5 120 ґрамами риби, а треце место завжали госци з Миклошевцох, зоз 1 760 ґрамами влапеней риби.
Поєдинєчно тиж найлєпши були домашнї – перше место завжал Мирко Фекете з 2 760 ґрамами риби, друге Яким Джуджар з 2 230 ґрамами, а треце место Златимир Рамач з 1 940 ґрамами влапеней риби.
По законченю змаганя Здруженє спортских рибарох ,,Коляк” на базену, у своїм лєтнїковцу, орґанизовало богати полудзенок и погосценє за шицких учашнїкох и госцох. 