РУСКИ КЕРЕСТУР – У Руским Керестуре на ютре, 19. авґуста, почина дводньова Туристично-привредно-културна манифестация „Днї керестурскей паприґи”, котра того року будзе отримана шести раз.
Перши дзень Манифестациї почнє з нащиву оглядному полю зоз гибридом „Каптур” и сорту „Слоново ухо” червеней роговей паприґи, на 11. г на Ярашу у Чизмарових. Попри тим, будзе орґанизована нащива ище даскелїм польом керестурских паприґарох.
Шветочне отверанє манифестациї будзе на 17,30 годзин, у центру валала, опрез Младежского дому. Штанди на котрих буду представени керестурски автохтони паприґово плоди, продукти з паприґи и друга желєнява, як и нашенково, хемийни и осиґуруюци хижи, того року буду поставени у парку, у самим центру Керестура.
Орґанизоване и варенє традицийних єдлох у петнац котлох, и печенє на двох рожньох, та шицки нащивителє годни покоштовац и велї єдла.
Нєдзельова часц Манифестациї почнє ма 14 годзин на Гиподроме „Леї”, з єднозапрагнима дринґацкима обегованями запрагох, будзе и вистава паприґи, продуктох з нєй и рижней другей желєняви, як и ревиялне двозапрагне дринґацке обегованє коньох, и рижни змисти за розвагу.
Отримованє Манифестациї потримали Покраїнски секретарият за польопривреду, водопривреду и лєсарство и Општина Кула.