РУСКИ КЕРЕСТУР – Рускокерестурска Катедрална церква св. оца Миколая нєшка преславює свойо храмове швето – Кирбай. З тим дньом ше означує дзень преношеня мощох св. Миколая з Мири у Малей Азиї до Барию у Италиї, котри пренєшени 9. мая 1087. року.
Кирбайска ранша Служба Божа будзе на 8 годзин, а Архиєрейска на 10 годзин котру будзе предводзиц владика Георгий Джуджар, вєдно з домашнїма и зоз священїками з других парохийох. По служби будзе одпустови обход з читаньом євангелийох. Вечарша Служба Божа на Кирбай нє будзе, алє на 19 годзин будзе Всеночне пред ютрейшим шветом Вознесенийом.
На Кирбай звичайно до Керестура приходза госци зоз наших местох, околїска, та и далєких крайох. Обчекує ше и богата вашарска часц, рижни бависка за розвагу дзецох и младих, цо почало ище пред даскельо днями.