БЕОҐРАД – Канцелария за людски и меншински права у Палати „Сербия” у Беоґрадзе нєшка на поладнє орґанизує схадзку з представителями националних совитох (НС) националних меншинох у Сербиї о розподзельованю средствох за финансованє роботи НС-ох у тим року.
На схадзки би мали буц придати ришеня з конкретну суму за финансованє каждого НС з буджету Републики Сербиї, а спред НС Руснацох Ришенє приме його предсидатель Славко Рац.
После тей схадзки, у Палати „Сербия” представительом НС-ох на 13,30 г. будзе представени Нарис другого Звиту о запровадзованю Акцийного плану за витворйованє правох националних меншинох.
По представяню, Нарис Звиту будзе доручени Совиту за национални меншини Републики Сербиї, Координациї НС-ох, як и Совиту за запровадзованє Акцийного плану за Поглавє 23 у прегваркох о приступаню Сербиї ґу ЕУ.