РУСКИ КЕРЕСТУР – Други дзень Туристично-привредно-културней манифестациї „Днї керестурскей паприґи” отримани нєшка, 20. авґуста, на Гиподроме „Леї”.
У орґанизациї Конїцкого клубу (КК) „Русин” отримани шейсц дринґацки обегованя и дефиле парадних запрагох домашнього Клубу. И попри дижджовней хвилї, було коло 400 нащивительох.
У дефилеу парадних запрагох КК „Русин” участвовали його предсидатель Желько Папуґа и члени Янко Планчак, Йоаким Чизмар, Владо Медєши, и Драґан Петрович, шицки и наградзени з погарами, а першу награду достал ветеран Планчак.
Шейсц дринґацки обегованя, єдна двозапрагох а пейц єднозапраги на 1 800 метери мали мена спонзорох – Месней заєднїци Руски Керестур, Скупштини општини Кула, Ремеселнїки и привреднїки Руски Керестур, Днї керестурскей паприґи, КК „Русин” и Мемориял яр 89.
Наградни фонд за пейц обегованя бул 30 000, односно 25 000 динари за остатнє обегованє, а участвовали конї чийо власнїки пришли з велїх войводянских местох, Того року члени домашнього Клубу наступали лєм у дефилеу.
У програми помедзи обегованя, орґанизатор и того року пририхтал интересантни бависка за публику, найвецей за наймладших як цо обегованя з ґереґу и у мехох, влап награду – когута и коще, а було и змаганє у нацагованю штранґу за младших и ветеранох.
Орґанизатор обезпечел и варене єдзенє у двох котлох, ошвиженє и музику, а зоз своїма продуктами штанд мало Здруженє женох „Байка”.
Обегованя коньох отримани под покровительством Општини Кула и Покраїнского секретарияту за польопривреду, водопривреду и лєсарство, и других спомнутих спонзорох.