БЕОҐРАД – Минимална цена роботней годзини у Сербиї од початку идуцого року будзе звакшана на 143 динари, за 13 динари вецей як є тераз, так же минималєц будзе коло 25 000 динари мешачно, гварел предсидатель Униї роботодавательох Сербиї Небойша Атанацкович за Бету после вчерайшей схадзки Социялно-економского совиту Сербиї. То звекшанє минималней цени роботи за дзешец одсто, а роботодавательом нє будзе звекшана основка за порцию.
– Министер финансийох Душан Вуйович обецал же зоз звекшаньом минималного заробку роботодавателє нє буду мац векши трошки, надпоминаюци же би звекшанє минималного заробку за вецей як дзешец одсто загрожело буджет у наступним року – гварел Атанацкович. Одлуку Социялно-економского совиту ма потвердзиц Влада Сербиї.
Репрезентативни синдикати вимагали звекшанє минималцу зоз 130 на 154 динари на годзину, а условиє Униї роботодательох було звекшанє лєм нєопорцийованей часци заробку, цо тераз коло 11 800 динари.
Минимални заробок тераз 22 800 динари, цо плаца коло 350 000 занятим у Сербиї.
У Социялно-економского совиту представителє Влади Сербиї, репрезентативних синдикатох и Униї роботодавательох.