НОВИ САД – Стреду у Новим Садзе, зоз шветочну програму, означена 70-рочнїца Часописа за дзеци „Йо пайташ”, 60-рочнїца снованя Друкарнї „Форум” и 73-рочнїца новинох „Мадяр Со”.
З нагоди тих ювилейох була шветочна програма у хторей предсидатель Покраїнскей влади Иґор Мирович визначел же информованє на язикох националних меншинох єден з найзначнєйших механїзмох за очуванє їх националного и културного идентитету и язика.
–То важне и держави, хтора зоз свою потримовку указує демократски капацитет и одношенє ґу тим вредносцох, заключел Мирович.
Предсидатеь влади визначел же и у наиходзацим року информованє на язикох националних заєднїцох будзе потримане, бо Радио телевизия Войводини, вєдно з дньовима новинами „Мадяр Со” и „Дневник”, творя три фундаментални слупи и найважнєйши символи явного информованя у АП Войводини.
На шветочносци, окрем предсидателя Мировича, бул и предсидатель Скупштини АП Войводини Иштван Пастор и подпредсидатель Покраїнскей влади и секретар за образованє, предписаня, управу и национални меншини-национални заєднїци Михаль Нїлаш.