Означени 14 роки од забойства Зорана Дїндїча

автор бта/тнґ/зам
1.1k Опатрене

БЕОҐРАД – Вчера, 12. марца, наполнєли ше 14 роки як забити предсидатель Влади Сербиї др Зоран Дїндїч, перши премиєр после паду режиму Слободана Милошевича 2000. року, за чийого мандату порушани процес демократизованя дружтва, економски и социялни реформи – преношели вчера нашо медиї.

Др Зоран Дїндїч бул єден зоз сновательох Демократскей странки (ДС), од 1994. року и єй предсидатель, а 1997. року бул и перши нєкомунистични городоначлнїк Беоґраду после 1945. року.

Забити є у Дворе Влади Сербиї 12. марца 2003. року, за його збойство на 40 роки гарешту осудзени официр Єдинки за специялни операциї (ЄСО) Ресору державней безпечносци Звездан Йованович, а на исту кару за орґанизованє забойства осудзени командант ЄСО Милорад Улемек.

З нагоди 14-рочнїци забойства премиєра Дїндїча, члени Влади Сербиї вчера положели венєц на спомин-плочу у дворе Влади, а почесц Дїндїчови на истим месце дали и члени Влади на чиїм чолє бул Зоран Дїндїч, як и члени Влади Зорана Живковича.

По Беоґрадзе вчера отримани и традицийни „Шпацир за Зорана”, предводзени з лидерами ЛДП и ЛСВ Чедомиром Йовановичом и Ненадом Чанком, а участвовали у нїм числени гражданє.

Попри найблїзшей фамелиї покойного Зорана Дїндїча, венци и квеце на його гроб у Алеї заслужних гражданох на Новим теметове у Беоґрадзе вчера положели и велї почитователє його дїла, як и представителє ДС и других политичних странкох.

У Югославянским драмским театру отримане и финалне змаганє младих у бешеднїцтве, з назву „Бешеди на чесц Зоранови”, хторе орґанизує Демократска странка.

ПОВЯЗАНИ ТЕКСТИ