ШИД – У церкви Преображеня Господнього у Шидзе прешлого тиня, 7. септембра, з модлєньом молебену до Пресвятей Богородици отец Михайло Режак означел двацец пейц роки як го за священїка пошвецел тедишнї крижевски владика кир Славомир Микловш.
Молебен на означованю ювилею служели о. Владислав Рац и о Михайло Режак, а присуствовали и о. Владислав Варґа, о. Дарко Рац о. Петро Дутка, о. Владимир Еделински Миколка и вирни зоз шидскей парохиї.
После пошвецаня о. Режак бул капелан у родним Руским Керестуре, а нєодлуга постава управитель парохиї у Беркасове и на тей длужносци бул по 2003. рок. Накратко є знова капелан у Керестуре, а од авґуста 2003. року є меновани за пароха у Сримскей Митровици, дзе службовал полни пейц роки.
Од 2008. року о. Михайло Режак парох у Шидзе, а як сримски декан ма духовну одвичательносц и над другима парохиями у Сримским деканату. Ушорює молитвенїк „Оче наш”, активни є и у робити коло другей духовней литератури у нашей заєднїци, а на широко познати його кишенкови калeндар на руским и українским язику.
У своєй пасторалней роботи о. Режак ше старал и о отримованю церковних будинкох, насампредз у Беркасове, Бикич Долу и Сримскей Митровици, а тераз ше стара о Лєтней владическей резиденциї у Шидзе.
Отец Михайло барз добре сотрудзує и з КПД „Дюра Киш” у Шидзе, з хторим орґанизує Уметнїцку колонию „Руски двор”, сотрудзує у орґанизациї Фестивалу тамбурових оркестрох „Мелодиї Руского двору”, активни є у винариї „Руски двор”, а насампредз медзи своїма парохиянами.