КУЛА/РУСКИ КЕРЕСТУР – Предсидатель Националного совиту Руснацох Славко Рац и рускокерестурски парох о. Михайло Малацко вчера, 7. марца, нащивели предсидателя Општини Кула Перицу Видеканїча, котрого поволали на централне означованє тогорочного значного ювилею – 200-рочнїци перших указаньох Мариї у Водици у керестурским хотаре.
Предсидатель Општини дзечнє прилапел поволанку, а попри тим, од нього достата и потримовка за оправянє драги до Водици, хтора на даскелїх местох барз очкодована пре нєдошлєбодзене преходзенє терховних камионох, насампредз з цвиклу.
– Локална самоуправа и задлужени за тоти роботи буду патриц же би ше тоти коло 100 метери драги, а думам же то будзе и вецей, пооправяло пред предвидзеним датумом за означованє того велького ювилею, же би и на тот дзень, а и познєйше, людзе нормално могли доходзиц до Водици – гварел Перица Видеканїч.
Славко Рац и о. Михайло Малацко предсидателя Општини упознали з Водицу як святилїщом значним за Руснацох и за других, як и же на централней преслави спомнутого ювилею у Водици, на Русадля 6. юния, обчекую велїх визначних госцох – церковних и державних достойнїкох з нашей жеми и иножемства.
– Попри тим же будзе присуствовац на шветочносци, од предсидателя Видеканїча зме достали потримовку за участвованє Општини у тим вельким сходзе, а барз зме задовольни же локална самоуправа дзечна пооправяц очкодовану драгу до Водици – гварел Славко Рац после стретнуца з предсидательом Општини Кула.