КУЛА/РУСКИ КЕРЕСТУР − Наиходзацей нєдзелї, 16. децембра у општини Кула буду отримани локални виберанки на котрих ше будзе гласац за нове зволанє Скупштини општини Кула котру творя 37-еро одборнїки.
Гласаче буду мац нагоду опредзелїц ше за єдну спомедзи осем лїстинох, на котрих єст вкупно предложено 168 кандидати, медзи котрима и осмеро Керестурци. Право гласац на териториї цалей општини маю 35 914 гражданє, з котрих у Керестуре коло 4 000.
Перши котри поднєсли кандидатуру то були коалицийни партнере дотерашнєй векшини, Општински одбор Сербскей напредней странки (СНС) и Союзу войводянских Мадярох (СВМ), а то лїстина котра ноши назву „АЛЕКСАНДАР ВУЧИЧ – ПРЕТО ЖЕ ЛЮБИМЕ КУЛУ”. На нєй ше находза 37-еро кандидати за одборнїкох локалного парламенту, а медзи нїма и тройо Керестурци – на 11. месце Мария Шепински (1953) пензионерка, на 19. Владимир Олеяр (1981) дїловни информатичар, и Тихомир Медич (1968) приватни поднїматель на 28. месце.
Друга по шоре преглашена лїстина „СОЦИЯЛИСТИЧНА ПАРТИЯ СЕРБИЇ – ИВИЦА ДАЧИЧ” на котрей ше находза 25 кандидати, медзи котрима тиж тройо зоз Руского Керестура – на трецим месце Весна Макаї (1979) кухарски технїчар, на 16. Ярослав Колбас (1973) дохтор медицини, и на 21. Весна Горняк (1987) кухарка.
Под шорним числом три на виберанкох будзе лїстина „РУХ ОБНОВИ КРАЛЬОВИНИ СЕРБИЇ – МАРКО КОШУТИЧ”. Ношитель лїстини зоз Кули, а медзи 25 кандидатами лєм 22. по шоре, Тамара Лакатош (1995) теолоґ зоз Руского Керестура.
Штварта лїстина „РУСИЙСКА СТРАНКА – ДУШАН ГАЙДУКОВИЧ – КЕКОВО ПРИНЦИПИ” понука 13 кандидатох, анї єден нє з Руского Керестура, а ношитель зоз Червинки.
На пиятим месце ше находзи лїстина „РУХ СОЦИЯЛИСТОХ – АЛЕКСАНДАР ВУЛИН”, на нєй ше находза 25-еро кандидати, тиж нїхто з Руского Керестура.
Шеста по шоре преглашена лїстина „СЕРБСКА РАДИКАЛНА СТРАНКА ДР ВОЇСЛАВ ШЕШЕЛЬ” на котрей 13-еро кандидати, медзи котрима анї єдна особа нє зоз Руского Керестура.
Лїстина „ПАРТИЯ ЗЄДИНЄНИХ ПЕНЗИОНЕРОХ СЕРБИЇ – МИЛАН КРКОБАБИЧ – И КУЛА СЕРБИЯ” преглашена под числом седем, на нєй 25 кандидати зоз шицких местох општини, а зоз Руского Керестура на 6. месце Владимир Надь (1952) пензионер.
Остатня преглашена лїстина котру поднєсла ґрупа гражданох, а ноши назву „ҐРУПА ГРАЖДАНОХ КРИТИЧНА МАСА”, на нєй за одборнїкох предложени 15 кандидати, алє нїхто зоз Руского Керестура.
Заключно з нєшкайшим дньом, на полноци почнє и предвиберанкова цихосц, кед преставаю и шицки предвиберанково активносци учашнїкох на виберанкох.
Зоз Општину по конституованє СО Кула, руководзи Дочасови орґан Општини Кула на чиїм чолє Велибор Милоїчич (дотерашнї предсидатель Општини Кула), а його члени Милорад Лазич, Милан Вуякович, Ливия Козма и Наташа Станоєвич.