СЛОВАЦКА – Парламент Словацкей Републики 10. мая принєсол Закон о Фонду за потримовку култури народносних меншинох, хтори службено почнє робиц 1. юлия того року, пише портал лем.фм.
З тим законом компетенциї за розподзельованє средствох за национални меншини у Словацкей з Уряду Влади прейду на новоосновани фонд, до хторого будзе пренєшена иста сума пенєжу як и дотераз – 8 милиони еври за цали рок за културни програми националних меншинох. Як наглашели снователє Фонду, з тим будзе обезпечена културна нєзависносц народносних меншинох у Словацкей, Фонд ма буц транспарентни, а проєкти за розподзельованє средствох буду оценьовац фахово комисиї.
– То значни крочай нє лєм за меншини, алє за цалу державу, бо култура народносних меншинох збогацує културу цалей Словацкей. Приношенє того закона то адекватно символизує – гварел з тей нагоди державни секретар у Министерстве култури Словацкей Конрад Риґо.
Зоз 8 милиони еврох, 4 одсто кажди рок будзе исц за роботу институцийох националних меншинох, а перши конкурси Фонд розпише початком идуцого року.
Як пише портал лем.фм, и попри тим же принєшени тот закон з хториме ше сце систематизовац финансованє култури народносних меншинох, Словацка ище вше нє ма закон о народносних меншинох. З нового фонду, як и дотераз, буду финансовани проєкти 13 народносних меншинох припознатих у Словацкей.
После мадярскей и ромскей, Русини у Словацкей по численосци треца национална меншина.