ВЕРБАС – У Вербаше пияток, 13. октобра отримана штварта схадзка Скупштини општини (СО) Вербас, на хторей перше одборнїкови з лїстини „Ошлєбодзме Вербас” Желькови Вуличови потвердзени одборнїцки мандат (виявел же будзе нєзависни одборнїк), понеже Вукашин Вуїчич з истей лїстини дал задзекованє на одборнїцку функцию, а потим прилапени звит о витворйованю буджету за перши тогорочни шейсц мешаци, хтори поднєсол предсидатель Општини Вербас Милан Ґлушац.
Як преноши портал Општини Вербас, приходи и приманя до буджету у спомнутим периодзе виношели прейґ 585 и пол милиони динари и у одношеню на исти период влонї, векши су за 18,5 одсто. На розходи за явне длуство потрошени нє цали 8 милиони динари, цо 24,09 одсто рочного плану, гварел Ґлушац.
Одборнїки СО Вербас прилапели Одлуку о окончованю комуналней дїялносци, Одлуку о поставяню менших монтажних и других обєктох дочасового характеру, Одлуку о сновательним акту ЯКП „Стандард”, по хторей ше тото подприємство почнє занїмац и з превозом путнїкох, як и Одлуку о снованю Явней аґенциї за зоогиґиєну и польопривреду хтора єй оможлївює занїманє и з продукцию квеца.
Потримовку владаюцей коалициї достала и нова одлука о утвердзованю доприносох за ушорйованє будовательней жеми, Одлука о дочасових монтажних обєктох – билбордох и меґабилбордох, вименєна одлука о хованю и теметовох, о роботним чаше погосцительних обєктох и обєктох за бависка на щесце, о правох на финансийну потримовку фамелийом з дзецми, о купованю нєрухомосци до явней власносци, як и Одлука о защити польопривредней жеми, шацох и засадох, дильовох и каналох од польскей чкоди.
Скупштина општини прилапела и дополнєну одлуку о Општинскей управи, Кадрови план Општинскей управи Вербас за 2017. рок, Звит о роботи ПУ „Бошко Буха” за роботни 2016/17. Рок и Програму дїлованя ЯКП „Комуналєц” за тот рок. На схадзки розришени дотерашнї и меновани нови команданти и їх заменїки, началнїки и члени Штабу за позарядово ситуациї Општини Вербас, а бешедоване и о дзепоєдних других кадрових питаньох.