О три роки нови будинок РТВ

автор фес
1.1k Опатрене

НОВИ САД – У просторийох Радио Нового Саду штварток, 19. октобра, отримана конференция за новинарох на хторей представена програма Радио-телевизиї Войводини, його информативни емисиї на сербским язику и на язикох националних заєднїцох, алє наявени и нови проєкти, ТВ и радио-емисиї хтори ше нєодлуга почнє емитовац.

Авторки, водительки и їх колеґиве з РТВ представели свойо емисиї информативней програми покраїнского явного сервису, наявели дзепоєдни пременки у їх випатрунку, як и нову програмну шему з новима змистами. Од новинарох и презентерох редакцийох на меншинских язикох РТВ бешедовали представителє мадярскей, горватскей, як и румунскей редакциї, котри бешедовал и у мено словацкей и рускей редакциї. Промововани и змисти Першей, Другей и Трецей програми Радия.

Директорка програми РТВ Соня Кокотович виявела же док ше нє достанє нови будинок РТВ и лєпши условия за роботу, шицки заняти ше буду старац же би и патраче и слухаче були задовольни.

Як поведзене, фундаментални камень за нови будинок на Мишелуку би мал буц поставени до конца того мешаца, на месце будинку РТВ Нови Сад зруйнованого у НАТО-бомбардованю 1999. року.

Новинаре нащивели и Мишелук, дзе роботи на скланяню остаткох старого будинку при концу, а по словох директорки Дирекциї за управянє з нєрухомосцами РТВ Марияни Дивляк, шицко будзе закончене мешац скорей як плановане.

Инвестиция на скланяню остаткох и вибудови будинку виноши 2,6 милиярди динари, а за першу етапу роботох Управа за капитални укладаня обезпечела 800 милиони динари. Нови будинок РТВ би мал буц закончени 2020. року.

ПОВЯЗАНИ ТЕКСТИ