НОВИ САД – У новим 35. числу новинох „Руске словоˮ рубрика Тижньовнїк приноши розгварку зоз шефом Оддзелєня за медиї Мисиї ОЕБС у Сербиї Домиником Тиєри и його становиско о наших новинох медзи меншинскима медиями у Сербиї.
Рубрика Нашо места пошвецена штернастей манифестациї „Днї керестурскей паприґиˮ, а ту и напис о манифестациї у Новим Орахове – XXV Швето нового хлєба. На бокох Економиї годно пречитац о тим як було на оглядним полю зоз паприґу у Руским Керестуре, як и упечатки Юлияна Колошняя о продукциї белавих парадичох у тим валалє.
На бокох рубрики Людзе, роки, живот приповедка о живоце Дюри Канюха зоз Ветернику, а боки рубрики Култура и просвита пошвецени Фестивалу жридлового шпиваня „Най ше нє забудзеˮ у Дюрдьове. Ту и напис о госцованю Велького народного оркестру Дома култури Руски Керестур на „Збойнїцким фестивалуˮ у Словацкей.
Рубрика Дружтво понука осме предлуженє фельтону „Як гуторя нашо дїдове – швет бул давно иншакиˮ чий автор о. Владимир Еделински Миколка, док Духовни живот приноши написи о Кирбаю у Шидзе и швету Преображенє Господнє у наших церквох.
Рубрика Спорт и у тим числу пише о фодбалу и резултатох яки зазначели фодбалере по наших местох, як и о турниру у кошарки „3 на 3ˮ у Руским Керестуре.
У новим числу вишол и додаток Литературне слово, як и крижалька, а на Горуцих тепшох рецепт за тарт зоз шлївками.