РУСКИ КЕРЕСТУР – Драмска секция Културно-уметнїцкого дружтва „Яким Гарди” з Петровцох на Драмским мемориялє Петра Ризнича Дядї вчера, 23. марца, наступела з представу „Державни крадош”, хтору по тексту Фадила Хаджича режирал Томислав Рац.
Представа на гумористични способ приказує ушоренє держави у хторей за повласцених людзох вше мож найсц „дзиру” у законє – дробни крадош и зводнїк Кики (Кристиян Медєши) у гарешту достава цимера Марка (Томислав Рац), котри державни крадош, а ма повласценя и у гарешту. За нїх задлужени чувар (Синиша Рац), котри пробує буц строги и напредовац, алє го менталитет поцагує и вони троме на комични способ приказую стан у дружтве, алє и думанє хлопох о женох.
На Мемориялє то було друге виводзенє тей представи, понеже премиєра у Петровцох була прешлей соботи, 18. марца. Як гварел режисер и ґлумец Томислав Рац, текст ше им попачел прето же є сучасни, а понеже КУД „Яким Гарди” ма вше менєй ґлумцох, тота представа з трома улогами була добре ришенє, так же татрална робота по руски у Петровцох предлужена и того року.
Вчерайшу награду публики за найлєпше одбавену улогу достал Кристиян Медєши за улогу „Кикия”.
Окрем спомнутих ґлумцох и режисера, у реализациї представи участвую и сценоґраф Мирослав Лехолат, за музику и ефекти задлужени Владимир Дудаш, за костими Снежана Лехолат, шветло Желько Костельник, а суфлерка була Таня Гарди.
(Вецей фотоґрафиї з представи у фото-ґалериї на правим боку сайту).