ДЮРДЬОВ – Вчера вечар, 17. марца, у просторийох КУД „Тарас Шевченко” у Дюрдьове подписане Ришенє о финансованю Подручней канцелариї Националного совиту (НС) Руснацох у Дюрдьове у тим року, а Ришенє подписали предсидатель НС Славко Рац и предсидатель Општини Жабель Чедомир Божич.
По Ришеню, средства з Општини за Подручну канцеларию НС у Дюрдьове звекшани за два раз у одношеню на прешли рок, и тераз буду 400 000 динари.
Ришенє о финансованю подписане на порядней схадзку Управного одбора КУД, на хторей присуствовали и спомнути Рац и Божич, предсидатель Скупштини Општини Жабель Радован Чолич, предсидатель Совиту Месней заєднїци Дюрдьов и член Општинскей ради (ОР) Жабель Душко Михелц, як и членїца ОР Нерима Шовлянски.
Госцох привитал предсидатель Управного одбору Дружтва Микола Кухар, а найвецей бешедоване о сотруднїцтве Општини Жабель и дюрдьовского КУД, чию роботу похвалєли обидвоме предсидателє.
Славко Рац гварел же НС Руснацох до тераз мал барз добре сотруднїцтво з Општину Жабель, дюрдьовску Основну школу и КУД-ом, хторе ма традицию порядней и масовней дїялносци, док предсидатель Општини Божич визначел же пре добре сотруднїцтво и ентузиязем, алє и резултати дюрдьовского Дружтва, Општина убудуце потрима шицки предлоги за сотруднїцтво и проєкти з хторима КУД будзе конкуровац на општински конкурси.
На схадзки домашнї госцом винєсли и план активносцох Дружтва у тим року дзе, медзи иншим, поведзене же Рочни концерт будзе 16. априла у Задружним доме, а на лєто плановане и госцованє у Польскей. Як гварел предсидатель Божич, трошки путованя заплаци Општина, а вироятно з аматерами и вон одпутує на тото госцованє.