НОВИ САД – Подпредсидатель Покраїнскей влади и покраїнски секретар за образованє, предписаня, управу и национални меншини-национални заєднїци Михаль Нїлаш вчера, 23. марца, у Покраїнскей влади з предсидателями (представителями) штернац националних совитох (НС) националних меншинох чийо шедзиско у Войводини, подписал контракти о їх финансованю з буджету АП Войводини.
За финасованє дїялносцох НС-ох у буджету АПВ вєдно опредзелєни 60 милиони 100 000 динари, у чим 47 милиони 100 000 за порядну, а 13 милиони за розвойну дїялносц.
У мено НС Руснацох контракт о финансованю з уровню Покраїни вчера подписал предсидатель НС Славко Рац, а за НС Руснацох у 2017. року з того уровню опредзелєни вєдно 3 милиони 115 936 динари, цо подобне як и прешлого року.
Як гварел подпредсидатель Покраїнскей влади и покраїнски секретар Михаль Нїлаш, з тима, як и зоз средствами з републичного, та општинских буджетох, обезбечене постоянє, дїлованє и змоцньованє културней автономиї националних меншинох.
Як важне Нїлаш визначел же прешлого року Влада Републики Сербиї прилапела Акцийни план за витворйованє правох анционалних меншинох, з хторим предвидзене и моцнєнє улоги и яснєйше дефинованє компетенцийох НС-ох. У тим напряме тирва и вименка Закона о националних совитох националних меншинох, до чого уключени и покраїнски секретарият на чиїм є чолє, гварел Михаль Нїлаш.
– Потребне дефиновац правне положенє НС-ох, їх статус, статус членох совитох, як и обезпечованє финансованя зоз шицких уровньох и дїлованє согласно Уставу Републики Сербиї и законским предписаньом у тей обласци – гварел на подписованю контрактох Михаль Нїлаш.
Винос за софинансованє дїялносци поєдиного НС-ту ше одредзує на основи фиксней и вариябилней часци – фиксна часц иста за шицки совити и виноши 30 одсто з цалосно опредзелєних средствох за тоту намену, док ше вариябилну часц одредзує на основи числа припаднїкох єдней меншини и числа єй установох – сообщене вчера зоз спомнутого секретарияту после после подписованя контрактох.
