КУЛА – Кнїжка „Нє бац ше од живота” Меланиї Арваї, своєродни фамелийни родослов у нєлєгких часох, представена публики всоботу 17. марца у просторийох РКУД „Др Гавриїл Костельник”, а у своєй едициї „Одняте од забуца” видало ю Дружтво за руски язик, литературу и културу з Нового Саду.
Присутних привитал предсидатель кулского Дружтва Владимир Бучко, а о першей кнїжки Арвайовей хтора и длугорочни член того Дружтва, як и предсидателька кулскей Секциї Дружтва за руски язикк, бешедовали секретар Дружтва Ирина Папуґа, рецензентка Любка Варґа Цвеїч, мр Гелена Медєши пречитала рецензию Любомира Медєша з Канади, а поведла и свойо видзенє кнїжки.
Свойо задовольство пре виходзенє кнїжки з присутнима подзелєла и сама авторка Мелания Арваї, и подзековала шицким цо ю у тим мотивовали, потримали, радзели и финансийно помогли друкованє, а то и вецей руски фамелиї зоз иножемства.
У уметнїцкей часци промоциї наступели домашня Мишана жридлова ґрупа з руководительку Еуфемию Планкош и два дуети хтори виведли народни шпиванки, рецитаторка Тимеа Будински з Руского Керестура, а виривки з кнїжки читали домашнї школярка Наталия Жирош и Владимир Бучко.
На концу промоциї спред видавателя Владимир Салонски уручел подзекованя шицким хтори заслужни за виходзенє представеного дїла Меланиї Арвайовей „Нє бац ше од живота”.