РУСКИ КЕРЕСТУР – У рускокерестурскей парохиї св. оца Миколая вчера преславене вельке швето – Преображенє Господнє, а на Служби Божей у Водици пошвецена овоц. У Водици и всоботу була одпустова Литурґия, на дзень Шнїговей Мариї.
Вчара, на Преображенє, Служби Божо були у катедралней церкви на 8 и 19 годзин, а на 11 г. Служба була у Марийовим святилїшу Водици, дзе пошвецена и овоц. Службу служели о. Янко Колошняї и о. Янко Гербут, обидвоме Керестурци, котри службую у Канади, а споведали домашнї капеланє о. Владимир Медєши и о. Михайло Шанта.
О значеню швета Преображеня и його важносци за нєшкайших християнох, наказовал о. Колошняї, а на Служби попри парохиянох, були и млади учашнїки Водицового кампу хтори ше там отримовал од 3. авґуста. На Служби були и фамелиї спомнутих священїкох з Канади, як и представителє госцох зоз Словацкей хтори пришли на Медзинародни турнир у рамикох Спортских бавискох „Яша Баков”.
Всоботу, 5. авґуста, у Водици на 10 годзин першираз Служба Божа була на тот дзень кед швето Шнїговей Мариї, та и у Водици бул одпустови дзень. Службу служел о. Владимир Медєши, а споведали о. Шанта и о. Владислав Варґа, парох у Сримскей Митровици и Беоґрадзе, котри и наказовал о Марийовим живоце як прикладу за каждого християна.
