КУЛА – У Шветочней сали Скупштини општини Кула додзелєни 10 контракти новим поднїмательом за субвенциї за самозанятосц, a медзи нїма єст и зоз Руского Керестура. Тоту програму вєдно реализую Национална служба за обезпечованє роботи и Општина Кула.
Контракти поднїмательом, прешлого тижня, уручели предсидателька Општини Кула др Весна Томич и директорка Националней служби за обезпечованє роботи – Филияла Зомбор Мая Дюкич.
Предсидателька Општини Кула др Весна Томич визначела же кажди нови поднїматель значи и злєпшанє економскей слики локалней самоуправи и поручела же ше наздава же таки и подобни програми буду реализовани и у будучносци. Вона поручела же средства обезпечени з часци зоз буджету локалней самоуправи, а з часци прейґ Националней служби за обезпечованє роботи, цо указує же зоз заєднїцку роботу мож дац конкретну потримовку тим хтори жадаю порушац, або злєпшац свою дїялносц.
Мая Дюкич, директорка Националней служби за обезпечованє роботи – Филияла Зомбор, похвалєла сотруднїцтво зоз Општину Кула и визначела же праве тото сотруднїцтво резултовало зоз новима контрактами за поднїмательох. Як гварела, нови поднїмателє ше найвецей опредзелєли за ремеселнїцку дїялносц, потим за продукцийну, насампредз за продукцию меблю у Руским Керестуре, як и за погосцительство, а єден контракт додзелєни и за адвокатску канцеларию.