РУСКИ КЕРЕСТУР – Млади зоз здруженя гражданох „Пакт Рутенорум”, всоботу 25. юлия, отримали роботну акцию ушорйованя терену за одбойку на писку на керестурским базену.
З тей нагоди баґер зоз терену викопал одприлики 10-15 центиметри старого писку и глїни, положена нова защитна подлога же би нїч нє росло и навежени нови писок. Тиж так положени и нови трибини, з оглядом же после акциї ушорйованя кошаркашского терену на пияцу остало даскельо нєпохасновани конструкциї и дески, хтори пред тим ошмирґлани и офарбени. Вонконцом терена принєшени и стари тракторски ґуми рижних велькосцох, до хторих насипани стари писок и глїна та на таки способ направене и бавилїще за дзеци. Єдине цо на терену ище хиби то мрежа, алє визначене же є поручена и же би нєодлуга требала сцигнуц.
Як гварели орґанизаторе, после роботней акциї на пияцу, явела ше им єдна особа зоз валалу хторей ше пачела така инициятива и пожадала донирац пенєжи за даяку подобну акцию, та на таки способ обезпечни средства за ушоренє терену за одбойку на писку.
Терен ушорени на час, з оглядом же ше планує турнир у одбойки на писку, хтори би мал буц отримани од 5. по 7. авґуст.
Пактовци подзековали на донациї, визначели же нови терен отворени за шицких и апеловали же би ше одвичательно хасновало тот простор, же би ше нїч нє руйновало понеже, нажаль, уж було таки приклади у прешлосци кед нєодвичательни поєдинци по терену вожели моторки и подобне.
