Уж є рок у заслуженей пензиї, а як кед би було вчера кед Шидянє у паркох, або на городских улїцох стретали Миленку Петко, хтора теди як руководителька у ЯКП „Стандард” була задлужена за отримованє желєних поверхносцох. Милена дипломована инжинєрка лєсарства, напрям пестованє и допатранє лєсох. Дипломовала 1986. року на Универзитету у Заґребе.
Так як то живот найчастейше покончи, перше почала робиц у фаху и то на отримованю желєних поверхносцох на спомин-памятнїку „Сримски фронт” при Адашевцох, а вец єден рок дочасово „на замени” праве у ЯКП „Стандард”.
– Вец сом надумала робиц цошка цалком друге, та сом 1989. року отворела фирму за предаванє школского и канцеларийного материялу и то предаванє на велько и на мало. Спочатку робота добре ишла и я ше добре знашла у нєй. Потим пришла война, принєсла вельки пременки и инфлацию и я, якошик, зоз фирму витримала по 1998. рок, а вец сом ше ознова врацела до фаху за хтори сом ше школєла – приповеда Милена Петко.
У дальшей бешеди предлужує же од 1. фебруара 1999. року почала робиц у ЯКП „Стандард” на отримованю желєних поверхносцох. Добре памета же кед почала робиц, бул лєм єден роботнїк хтори бул задлужени за кошенє трави у паркох. Вец 2000. року була основана Роботна єдинка за отримованє желєнїдла и мала трох роботнїкох хтори ше старали о орезованю древох „на желєно” и резали сухи стебла, а пейцме були задлужени за кошенє трави. Желєни поверхносци ше отримовало нє лєм у Шидзе, алє и на валалох, та аж и у Шимановцох и Мартинцох дзе подприємство достало нови роботи, а по потреби и у других месних заєднїцох звонка шидскей општини.
– Месна заєднїца Шид була одвичательна за желєни поверхносци, вимерала сом шицки парки и городски теметови. Почали зме доставац и лєпшу опрему як цо тримери за кошенє, менши тракторски и єдну ротацийну косачку, а мали зме и трактор зоз меншим прикочом за зазберованє конарох и подобне. Були зме задлужени за отримованє спомин-памятнїка „Сримски фронт” и гранїчних преходох. Остарала сом ше же би почали садзиц квеце на явних поверхносцох и же би покладли жардинєри за квеце на драже – гвари Милена.
През роботни вик, додава, вше учела и дацо нове и усовершовала ше найвецей кед слово о гортикултури. Учела и як випроєктовац и виплановац желєну поверхносц, и як вона будзе випатрац, а то робела з помоцу фаховей литератури и у черанки искуствох зоз колеґами зоз других штредкох.
– Шицко цо сом обдумала перше ишло на потвердзенє до Месней заєднїци, а потим и до Општини. Мушело ше водзиц рахунка яки младнїки древкох садзиц на улїцох пре електроинсталациї хторим вельки древа завадзали, а тиж и же би нє мали кореньову систему хтора подзвигує и очкодовює бетон, або асфалт. Прето остатнї роки садзени младнїки зоз єдним главним кореньом хтори идзе до глїбини. Тиж так ше мушело водзиц рахунка и о файтох древох хтори подноша менши количества води пре лєтни горучави и суши – толкує вона.
Зоз своїм длугорочним искуством заключує же остатнї роки досц попрепадали жимжелєни древа пре „квашни дижджи” и пре нагли пременки температури, а то спричинєло рижни хороти. Окреме досц попрепадали „смреки” хтори нападнул червоточ, и то цали стебла хтори ше осушели.
– Остатнї роки зме робели и на формованю такволаних витрозащитних пасмох. У напряме коло драги Куковци–Ердевик посадзени коло 4000 младнїки лїпи и тополї. Було то у новембре 2024. року и робело ше два мешаци. Министерство за защиту животного штредку зробело проєкт и финансовало го. Предкладала сом же би ше старали и о отримованю потоку Шидини у цеку през город дзе бетоноване побрежє и сподок, алє то нє прилапене. Кед сом робела, вше сом ше намагала нє лєм розказовац роботнїком як и цо треба робиц, алє сом и сама „викасала рукави”, указовала сом им, алє и робела з нїма. Було то так по одход до пензиї 14. априла прешлого року. Любела сом свою роботу и було ми мило кед ме людзе похвалєли же дацо добре поробене, або и кед добронамирно давали даяку заувагу, або совит. А и нєшка, кед як пензионерка прейдзем през город, вшадзи шлїди моєй роботи – гвари на концу розгварки панї Милена Петко.
Занавше у паметаню
Кед би ше Милени опитали цо єй окреме останє у паметаню у єй роботней кариєри, вшелїяк же то велька буря хтора залапела Шид 19. юлия 2023. року.
– За пол годзини моцни витор и диждж знїщели людзом закрица и урожаї на польох, а барз очкодовали и древа у паркох и по улїцох. Накадзи буря престала, шицки роботнїки, и я вєдно з нїма, вишли на терен, бо требало розкерчиц улїци и драги од поваляних древох. Робело ше до рана. У наступних даскельо мешацох ше санировало парки, а найчежше очкодовани бул парк у Улїци Дюри Киша дзе поламани жимжелєни древа мушели буц цалком спилєни. Тоту часц парку зме цалком подмладзели зоз стеблами ґестинї и лїпи. Младнїки зме потим залївали, а обнова городских паркох роками будзе тирвац – гвари Милена Петко.