На другей програми Радио-телевизиї Войводини (РТВ2) у септембру прешлого року почало емитованє вецейязичней младежскей емисиї „Пулс младих”. Вона продукт сотруднїцтва меншинских редакцийох РТВ-а и Дойче Веле Академиї, а у рускей програми ю мож патриц у термину дакедишнєй емисиї „Часи младосци”, кажди штварти штварток у мешацу, на 21 годзин.   

„Пулс младих” творя млади новинаре зоз горватскей, ромскей, мадярскей, румунскей, словацкей, та и зоз рускей редакциї, у хторей Любица Фечо и Марина Хома.

– Пред двома роками нам менторе зоз Дойче Веле тримали обуку же би нас научели як ше витворює емисию по даяких їх стандардох, а „Пулс младих” резултат того семинара – толкує Марина, а Любица додава же емисия тирва коло пол годзини и у нєй кажда редакция ма свой прилог, на своїм язику.

– Емисия идзе на РТВ2 на шицких язикох. Емитує ше ю и на РТВ1, титловану на сербски язик, а мож ю патриц и познєйше – „одложено”. Кед, наприклад, емисия идзе у нашей програми, вец ше ю титлує на руски язик. „Часи младосци” нє вируцени цалком, ми и далєй провадзиме шицки младежски збуваня, лєм ше их емитує у рамикох наших других емисийох – визначує Любица.

Фото: В. Вуячич

Млади новинаре перше експериментовали з рижнима концепциями, а вец похопели же им найбаржей одвитує кед емисиї тематски.

– Интересантне тото же у емисиї заступени вецей язики и култури. Нє кладземе фокус на фолкор и традицию, алє вецей обрабяме такв. универзални теми. Поента у тим же зме ту шицки вєдно, же ше дружиме и вєдно твориме. Векшински народ часто видзи меншини лєм през призму традициї, а ту можеме указац же и ми єднак перципуєме реалносц коло себе, як и шицки други. Маме простор буц креативни – гвари Марина. Зоз тим ше склада и Любица, хтора наглашує же ше  през тоту емисию мож баржей упознац зоз другима народами, иншакима приступами, поглядами, интересантносцами…

Кед штвартого штвартку у мешацу нє сцигнєце одпатриц емисию „Пулс младих”, можеце ю пренайсц на сайту РТВ-а, у рубрики „Одложене патренє”, односно на media.rtv.rs/sr_ci/puls-mladih/35198.