Тих дньох предлужене диґитализованє Бруґошових неґативох

автор маф
999 Опатрене

РУСКИ КЕРЕСТУР – Вчера закончена ище єдна фаза диґитализованя, чисценя и идентификованя фотоґрафийох на склєняних неґативох зоз фотоґрафскей роботнї оца и сина Осифа и Йовґена Будинскових – Бруґошових, а потераз обробени коло 700 неґативи од скоро 1 200 кельо єст у леґату.

Диґитализованє од 10. октобра окончене на керестурскей парохиї хтора и власнїк того леґату неґативох, а окончела го стаємна екипа фаховцох з Покраїнского заводу за защиту памятнїкох др Миряна Дєкич и Неделько Маркович, з Музею Войводини Любица Отич и зоз зомборского Архиву Саша Сабадош.

Як за Рутенпрес наглашела Отичова, од 700 обробених неґативох 140 уж и очисцени и пририхтани за друкованє, а як познате, нарок ше планує видац и моноґрафию вибраних фотоґрафийох.

Попри тим же неґативи скенирани, велька часц фотоґрафийох и идентификована, та и у тей часци роботи помогли вецей информаторе з Керестура. Як наглашела Отичова, велька часц скорей обробених фотоґрафийох идентификовани и дзекуюци тому же су стаємно обявйовани у часопису „Руске слово”.

И тота фаза диґитализованя неґативох зоз Бруґошового леґату окончена дзекуюци потримовки нашого Националного совиту, а ношитель тей роботи Покраїнски завод за защиту памятнїкох.

12.10.2017.- Identifikovanje Brugosovih negativoh 002_resize

ПОВЯЗАНИ ТЕКСТИ