Укладаю штири милиони евра

автор але
1.4k Опатрене

Шицки пейц населєня у Општини, хтори од 2006. року у обисцох нє маю одвитуюцу воду, конєчно у своїх чопох би требали достац воду за пице.

Влада Републики Сербиї прешлого тижня подписала контракти у рамикох програми „Помоц у подмирйованю з воду за штреднї општини у Сербиї” хтори ше реализує зоз Нємецку розвойну банку (Kfw). Подпредсидателька Влади Републики Сербиї и министерка будовательства, транспорту и инфраструктури Зорана Михайлович подписала контракти зоз представителями општинох Вербас, Кикинда, Княжевац и Парачин, вкупно 17 милиони евра.

Як наглашене на схадзки, зоз тим проєктом би требало ришиц питанє квалитетного подмирйованя зоз воду за 123 тисячи жительох тих штирох општинох.

ВИГОДНИ КРЕДИТ

У мено општини Вербас контракт о кредиту Нємецкей розвойней банки подписал Милан Ґлушац, предсидатель Општини Вербас, хтори наглашел же у врацаню кредита ґрейс период пейц роки, а окремни олєгчуюци факт и то же 30 одсто кредиту безповратни средства.

– Тирваци проблем зоз воду за пице и проблем зоз водоподмирйованьом у Општини Вербас спатрали зме длугши час и тераз зме нашли ришенє зоз Нємецку розвойну банку и подприємством „СЕТЕК инженєринґ”. Удало нам ше витвориц шицки условия же бизме достали тоти средства и тераз конєчно и нашо гражданє у населєних местох општини Вербас буду мац воду за пице у своїх обисцох – гварел Ґлушац.

Фахова служба Дїловней єдинки „Водовод и канализация” уж три роки роби на витворйованю потребних условийох за кредит. Руководитель тей дїловней єдинки Мирослав Фейса гвари же у сотруднїцтве зоз „СЕТЕК инженєринґом” перше поробена анализа стану водоподмирйованя.

– Же бизме ше могли квалификовац до другей фази мушели зме сполнїц велї условия, а медзи нїма єдно зоз важнєйших же бизме о пейц роки могли почац врацац уложени средства. Ту и укладаня 10 евра по приключку, потим укладаня до енерґетскей ефикасносци подприємства, розвиванє одношеня зоз трошителями… Зоз нашима и општинскима средствами зме унапредзели водоподмирйованє и значно зашпоровали електричну енерґию, а у велькей мири зме зменьшали траценя на водоводней мрежи – визначел Фейса.

СТРАТЕҐИЙНИ ПРИСТУП

Шицко цо поробене оможлївело добру позицию за формованє одвитуюцей стратеґиї и вимоги водоподмирйованя у општини Вербас.

– Стратеґия подрозумює вибудов двох ушореньох за пририхтованє води капацитета коло 120 литри у секунди и резервоар капацитета коло 2 тисячи кубни метери. Часц проєкту и два цивоводи Вербас – Коцур – Савине Село и Коцур – Змаєво – Равне Село – Бачке Добре Польо длужини 32 километри, хтори прейґ водоводней мрежи буду повязани зоз централним пошореньом водозалапеня – додава Фейса.

Зоз реализацию того проєкту обезпечело би ше тирваце и квалитетне подмирйованє зоз воду за пице у шицких пейцох населєних местох општини Вербас и направело достаточни количества води за город Вербас.

ТИРВАЦЕ РИШЕНЄ

Проблем зоз воду у вербаскей општини датує ище зоз 2006. року, кед покраїнска санитарна инспекция воду у пейцох населєних местох преглашела за здравствено нєисправну пре нєдошлєбодзени количества арсену, манґану, нитриту и желєза.

Теди Општина пробовала ришиц тот проблем зоз поставяньом еко студньох у каждим валалє. Медзитим, жителє валалох, окреме Савиного Села, нє були задовольни зоз таким дочасовим ришеньом, а одредзене число жительох престало плациц рахунки за воду. Цали проблем кулминовал кед Явне комуналне подприємство почало „гашиц” воду гражданом пре длуства, а валалчанє поднєсли заєднїцку тужбу од пейц милиони динари процив Општини Вербас и ЯКП „Стандард”. Тото ришенє би требало занавше ришиц проблем зоз воду шицких гражданох општини.

38 djilovna jdinka

ПОВЯЗАНИ ТЕКСТИ