ШИД – На схадзки Општинскей ради (ОР) отриманей вчера 13. децембра, утвердзени предлог буджета за 2019. рок хтори предложени у виносу од 1 489.000 динари и як новинаром гварене, буджет будзе розвойни.
Ядранка Недич, руководителька Оддзелєня за буджет и финансиї, гварела же у буджету плановани и капитални инвестициї як цо виробок документациї за ґенералне реґулованє Шиду, предлуженє роботох на вибудови дражки здравя на Лїповачи, ушорйованє индустрийней зони при Адашевцох, вибудов кружного цеку у Шидзе, вибудов водоводней мрежи у Люби, асфалтованє локалних драгох и подобне.
На питанє чи буду звекшани у 2019. року порциї на маєток хтори наплацує локална самоуправа, Недичова анї нє потвердзела, а анї нє демантовала, алє гварела же треба причекац схадзку Скупштини општини Шид, хтора приноши конєчну одлуку о буджету.
ОР тиж принєсла и предлог одлуки о ребалансу буджета за 2018. рок з хтору приходи предложени у виносу од 1 270.000 динари.
ОР предложела и окончователя длужносци директора Туристичней орґанизациї и то Зорица Ґраховац, з оглядом же потерашня директорка Кристина Радосавлєвич задзековала на тоту функцию.
