КОЦУР – У Етно-клубу „Одняте од забуца“ у Коцуре, всоботу, 27. мая, Янко Лазор дзецом представел стари бависка, а присутних здогаднул и на дакедишнї способ живота и бавеня без интернету и других нєшкайших сучасних технолоґийох.
Школярох трецих и штвартих класох ОШ були наисце любопитлїви и интересовало их як дакеди випатрали дзецински бависка, та даєдни и приказани, а сами бешедовали о нєшкайшим бавеню на улїци зоз своїма парняками.
Дзеци од Янка Лазора дознали же ше нєшкайши „джмурки“ у Коцуре дакеди волало „на ґалами“, же дзеци бавели млїнчки, пиличканє, чинаґанє (бависко лєм за старши дзеци), бависка зоз зарнами кукурици и други.
Лазор здогаднул и же реквизити за дзепоєдни бависка дзеци правели сами, нпр. з чуткох кукурици, як и же дзечнє слухали приповеданє старших о їх дожицох и рижни приповедки, а нєшка шицко мож видзиц на телевизиї и по интернету.
Предсидателька Етно-клубу Аранка Медєши з тей нагоди гварела же стретнуце орґанизоване най дзеци дознаю як дакеди випатрало дзецинство и бависка хтори бавели их баби и дїдове, та так и надалєй жию през здогадованє и приповедки.
