КУЛА – У грекокатолїцкей парохиї священомученїка Йосафата парохиянє и їх госци преславели храмове швето – Кирбай зоз шветочну Архиєрейску Литургию хтору предводзел наш еґзарх преосвящени владика Георгий Джуджар.
З владиком сослужели и осемцме священїки, попри домашнїх и з других наших парохийох, як и зоз Словацкей протоигумен словацкей провинциї монахох василиянох Кирила и Методия, Методий Милан Биланчик ЧСВВ, и єрономах Поликарп Штефан Яцош з Требишова.
Владика Георгий у своєй казанї о живоце св. Йосафата визначел же вон бул святи Христов апостол и мученїк за виру и єдинство Церкви, а домашнї парох о. Дамян Кича ЧСВВ привитал шицких присутних и госцох.
Пред Службу Божу владика пошвецел два нови стояци икони – розпяце и воскрешенє хтори буду поставени опрез иконостаса. По концу Служби владикови бул представени нови Церковни одбор кулянскей парохиї хтори тей яри ступел на длужносц, а владика каждого члена благословел. По Служби тиж було и мированє.
Кирбайска Литурґия закончена зоз обходом коло церкви и читаньом Євангелийох, а домашнї вирни у церковней сали за шицких госцох пририхтали почасценє. Служба Божа на Кирбай була и рано на 8 годзин.