НОВИ САД – Трицец перше тогорочне число новинох „Руске слово” у рубрики „Тижньовнїк” информує о перших схадзкох з нагоди Централней преслави националного швета Руснацох у Суботици, а рубрика „Нашо места” дава вистки зоз волонтерских кампох у Руским Керестуре и Коцуре. Ту и напис о чежких условийох у хторих роби дюрдьовске добредзечне огньогасне дружтво, док на „Економиї” зазначене яки бриґи виволала суша у керестурским хотаре.
„Култура и просвита” дава звити зоз отриманих подобових колонийох у Ґосподїнцох и Шидзе, а ту и текст о 15-рочнїци роботи школи рисованя Влади Нярадия з Вербасу.
У рубрики „Духовни живот” пише о формованю Церковного одбору у керестурскей парохиї и о тим як преславени Кирбай у Новим Вербаше.
„Мозаїк” зазначел як було на журки PACT ON у Керестуре и Манифестациї „Дюрдьов отвореного шерца”, а на бокох рубрики „Людзе, роки, живот” читаче можу упознац Кечкешових зоз Шиду и Юлияна Неваляного з Коцура, а ту и нове предлуженє фельтону „Як (нє) скапал рокенрол”.
На „Спорту” напис о активносцох Столно-тениского клубу „Русин”, промоциї фитнес-парку у Вербаше, и напис о спортскому дохторови Мирославови Копчанскому.
У тим чишлє додаток „Руске слово у швеце”.