НОВИ САД – Трицец седме тогорочне число новинох „Руске слово” у рубрики „Тижньовнїк” пише о початку пририхтованьох за означованє Националного швета Руснацох нарок у Суботици, а рубрика „Нашо места” понука актуални вистки зоз Шиду, Жаблю, Кули и Коцура.
На бокох „Економиї” спатрена робота Польочуварскей служби у кулскей општини, а ту и текст о урожаю кукурици у дюрдьовским хотаре.
На „Култури и просвити” мож пречитац як керестурски школяре прилапели школски униформи, о планованей културней програми у Городским музею у Вербаше, як и о запровадзованю реформи школства у вербаских школох.
„Мозаїк” зазначел атмосферу на першим рок-концерту за младих у Шидзе, у орґанизациї члених КПД „Дюра Киш”, док на бокох рубрики „Людзе, роки, живот” нове предлуженє фельтону „Як (нє) скапал рокенрол”. На тих бокох представени и Леона Ликов з Нового Саду и Ана Провчи зоз Шиду.
„Духовни живот”, медзи иншим, пише о преслави Кирбаю у Миклошевцох и о нащиви священїкох з Румуниї керестурскому Каритасу.
На „Спорту” резултати фодбалских и других клубох з наших местох, звит зоз змаганя у лапаню риби у рамикох Спортских бавискох „Яша Баков”, а зазначени и перши наступ наймладших членох Столнотениского клубу „Русин” з Керестура на єдним змаганю. У тим чишлє додаток „Руске слово у швеце”.