У присустве державних секретарох отворене Совитовалїще за малженство и фамелию

автор зам
1.2k Опатрене

КУЛА – У Кули вчера, 30. марца, отворени нови просториї Совитовалїща за малженство и фамелию Центру за социялну роботу (Центер) Општини Кула, а на пригодней шветочносци присуствовали и двоме державни секретаре у Министерстве за роботу, обезпечованє роботи, борецки и социялни питаня Владими Илич и Ненад Иванишевич, заменїца покраїнского секретара за социялну политику, демоґрафию и ровноправносц полох Милка Будаков, як и предсидатель Општини Кула Перица Видеканїч. Домашня им була директорка Центру Ґордана Вакула.

Як визначели и госци и домашнї, нови простор за спомнуту услугу источашнє и часц означованя ювилею Центру – 55-рочнїци його снованя, понеже з роботу почал у октобре 1962. року.

Державни секретар Владимир Илич з тей нагоди визначел же опредзелєнє Влади Сербиї и єй Министерства за роботу, обезпечованє роботи, борецки и социялни питаня нє зменшовац, алє аж и звекшовац средства у тей обласци за помоц менєй розвитим локалним самоуправом у цалей Сербиї, та прешлого року вєдно 400 милиони достали 123 општини и городи, а у тим року тоти трансферни средства звекшани на 700 милиони динари.

Зоз спомнутих трансферох Општина Кула, як општина другей катеґориї по розвитосци, за обласц социялней защити прешлого року достала 4,5 милиони динари, з хторих часц опредзелєна и за простор Совитовалїща, а у тим року Кули опредзелєни 8 милиони динари.

Ґу тому, державни секретар Ненад Иванишевич вчера у Кули гварел и же министрови Александрови Вулинови будзе предложене же би кулски Центер за социялну роботу вошол на нову лїстину, медзи 20 установи, за вибудов нових будинкох зоз средствох Канцелариї за явни укладаня Сербиї. Понеже терашнї простор Центру наисце нєвигодни, тота информация вчера барз добре привитана.

На ювилею, як и на отвераню Совитовалїща, Центру повинчовала и заменїца покраїнского секретара за социялну политику, демоґрафию и ровноправносц полох Милка Будаков, визначуюци же то барз значни крочай кед маме у оглядзе же фамелия основа каждого дружтва, а у Совитовалїщу фамелиї хторим то потребне тераз годни достац адекватну фахову помоц.

Совитовалїще за малженство и фамелиї у кулским Центре роби од скорей, алє тераз ма и окремни просториї и змесцене є на углє у Ленїновей улїци ч. 5 и улїчки Светозара Марковича, а уход зоз Светозара Марковича (дзе дакеди була СОФК-а, тераз СПО, Шах-клуб).

Совитовалїще кажди роботни дзень роби од 9 до 12, а вовторок и штварток и пополадню, од 16 до 19 годзин. Робя єден социялни роботнїк и правнїк, а услуги Совитовалїща безплатни. У нїм опремени и простор за стретнуце малолїтних дзецох з родичами, лєбо родзину, на основи судских одлукох.

После нащиви Совитовалїщу, директорка Центру Ґордана Вакула присутним представительом орґанизацийох и здруженьох з обласци социялней защити з Кули и других општинох, окреме представела роботу тей установи.

ПОВЯЗАНИ ТЕКСТИ