Суша у ораховским хотаре, яку ше давно нє памета, охабела шлїди на урожайох на шицких польопривредних продуктох.
У новоораховским хотаре уж роками найзаступенши польопривредни култури то ярец, жито, кукурица и слунечнїк, и дакус менєй доган, а шицки вони прецерпели пошлїдки од нєдостатку влаги.
Житарки хтори пошати вєшенї 2016. року у оптималних терминох ше добре ровивали, алє моцна и суха жима на нїх дїйствовала нєвигодно. После моцней жими без шнїгу, пришла сушна яр.
У ораховским хотаре того року було барз мало дижджу и на житу и ярцу уж початком мая могло обачиц же урожаї буду слаби, цо ше и указало под час тлачидби.
Просеково по гольту ярцу, а так и жита, зродзело 22 до 24 метери зарна, зависно од сорти. И квалитет зарна бул вельо слабши як просеково. Гвари ше же дзе єст слами, там єст и зарна, а того року Новоораховчанє барз кубуря и зоз сламу. Житарки були нїзки, та и слами було барз мало.
И док ше даєдни роки сламу заорйовало, або палєло, гоч и було забранєне, того року ше зберало кажду сламку. Попресовану сламу ше такой одношело, бо було случаї же до рана попресовани бали щезли.
Початком априла, кед ше починало зоз садзеньом слунечнїку и кукурици, ораховски хотар достал дакус дижджу, та зарна зишли и добре ше розвивали. Алє после того, дижджу було у Орахове аж штредком юлия, коло 25 литри на квадратни метер.
За жадну жем, то було барз мало. Спочатку ше указовало же познєйше посадзени парцели лєпше витримаю сушу, алє моцни горучави и на нїх охабели шлїд.
Цо ше дотика кукурици, єст подаєдни парцели хтори, заш лєм, принєшу даяки род, алє векшину ше похаснує до силажи. Парасти хтори ище нє предали прешлорочну кукурицу, анї нє понагляю лупац. У валалє ше кукурицу предава на метер-два, од два по два тисячи и сто динари за сто кили, док на велько нє мож найсц кукурици.
Кед слово о слунєчнїку, ситуациї иста – суша поробела свойо. Прешлого тижня покошени и перши парцели, а урожай бул од 9 по 13 метери по гольту, зависно од сорти нашеня.
Випатра же того року хмари найбаржей заобишли Орахово, бо у околних хотарох було вецей дижджу, та випатра же там и урожаї буду дакус лєпши.